姚焯菲只限周末日工作
父母出馬與無綫傾掂數
姚焯菲（Chantel）、文凱婷、詹天文、冼靖峰及何晉樂5位《聲夢傳奇》學員，昨到尖沙咀出席《Gimme LiVe》音樂節活動，現場招待近百Fans，同時吸引大批Fans到場支持偶像，擠滿商場4層樓。
Chantel與文凱婷二人一起受訪，對於比賽後工作不斷，Chantel表示已沒之前比賽那麼忙，但因已開學，父母跟公司已溝通過，星期六、日才接工作。提到炎明熹開學在即仍在趕暑期功課，就讀國際學校的Chantel表示學校冇暑期功課。升讀大學Final Year的文凱婷因9月底才開學，目前仍可以全職歌手身份工作。近日Chantel接拍了銀行廣告，她表示酬勞交畀父母keep，她亦有請同學食零食。她又謂想拍化妝品廣告，文凱婷就最想拍眼藥水廣告，因經常長時間戴隱形眼鏡，對眼會好乾。
冼靖峰稱現時每次出騷前，心情仍然緊張，但過多幾秒投入去唱就OK。他直言好想舉行Fans聚會，想同Fans一齊食炸雞，又想打邊爐。他更透露：「上次開騷後收到個hand make蛋糕，要幾千蚊，我叫咗下次唔好，我知佢哋有計劃落廣告，想佢哋停一停，因為太瘋癲，使太多錢我會心痛，因為好多Fans係中、小學生，佢哋啲錢都係問父母拎。」
